ՀՀ վարչապետ Նիկոլ Փաշինյանը Ազգային ժողովում կառավարության ծրագրի քննարկման ժամանակ ասաց, որ արտահերթ խորհրդարանական ընտրությունները կանցկացվեն մեկ տարվա ընթացքում։
«Այս ժամկետն անհրաժեշտ է, որպեսզի քաղաքական ուժերը, որոնք պատրաստ չէին հեղափոխությանը, նախապատրաստվեն արտահերթ ընտրություններին, իսկ քաղաքացիները հնարավորություն ունենան կատարել գիտակցված ընտրություն, որը հիմնված է քաղաքական ուժերի գործունեության արդյունքների վրա», – պարզաբանեց նա։
Վարչապետի խոսքով, այս ժամկետը կօգտագործվի նաև Ընտրական օրենսգիրքը բարեփոխելու համար, և այդ նպատակով ստեղծվել է համապատասխան աշխատանքային խումբ, որի կազմում կներառվեն հասարակության տարբեր շերտերի ներկայացուցիչներ։
