ՀՀ Արմավիրի մարզի Ակնալիճ համայնքի Արա Հարությունյանի անվան միջնակարգ դպրոցում սեպտեմբերի 1-ին կրկին հնչեց Գիտելիքի օրն ազդարարող զանգը: Տոնական ղողանջներով մեկնարկեց կրթության ոլորտում նոր նպատակների և սպասելիքների իրականացման երթը:
Դպրոցի բակում ծնողներն ու հյուրերը վայելեցին աշակերտների երգը, նազանի պարմանուհիների հեզաճկուն պարը, որից հետո դպրոցի տնօրեն Վարդիթեր Վարդերեսյանը ողջունելով աշակերտներին և ծնողներին նոր ուսումնական տարվա առթիվ նրանց ներկայացրեց հյուրերին՝ Արցախի Հանրապետության <Ֆիդայիններ> կառույցի ղեկավար Ռոման Բալայանին, Երկրապահ կամավորական միության Էջմիածնի տարածաշրջանային բաժնի նախագահ Հրաչյա Մանուկյանին:
Ռոման Բալայանն իր ողջույնի խոսքում կարևորեց ուսուցման գործընթացում ներգրավված յուրաքանչյուր մանկավարժի, աշակերտի, ծնողի և պաշտոնյայի դերը, որին նրանք պետք է մոտենան բարձր գիտակցումով:
-Շնորհավորում եմ ձեզ Գիտելիքի օրվա կապակցությամբ, և թող տա Աստված, այս գեղեցիկ փուչիկները երկինք բարձրանան միայն խաղաղ պայմաններում: Ես ուզում եմ առաջին հերթին գլուխս խոնարհել Ակնալիճ համայնքի հերոսներ ծնած բոլոր սուրբ մայրերի առջև, գլուխս խոնարհել այս համայնքի զոհված տղաների, ներկայիս զինծառայողների և պատերազմի վետերաների առջև: Մեր այցն այսօր պատահական չէ ձեր դպրոց, քանի որ այն կրում է մի անձի անուն, ով դեռ մանկուց եղել է մեր իդեալը: Ես գլուխ եմ խոնարհում Արա Հարությունյանի հիշատակի առջև: Պատվարժան հայրենակիցներ, յուրաքանչյուրս պետք է գիտակցենք, որ ճիշտ կրթությունն և դաստիարակությունն է ապագա հայրենիքի զարգացման հզոր ու միակ գրավականը: Սիրելի աշակերտներ, մենք պետք է աշխարհին ցույց տանք, որ հայը կա՛, հայը ու՛ժ է, հայը սրբությու՛ն է: Աստված, Արցախ-Հայաստան և հայ ազգ,-ասաց Ռոման Բալայանը:
Այնուհետև Ռոման Բալայանը <Իմ Հադրութ> հայրենասիրական –բարեգործական հասարակական կազմակերպության կողմից հայրենիքին անմնացորդ նվիրման և ռազմահայրենասիրական ակտիվություն ցուցաբերելու համար պատվոգիր և շնորհակալագիր հանձնեց դպրոցի աշակերտներ Վանյա Մատինյանին, Վարդգես Սարուխանյանին, Համլետ Ասլանյանին, Լևոն Ավագյանին, Ավետիք Հարությունյանին և Իննեսա Զուրարդյանին:
Նոր ուսումնական տարվա և Գիտելիքի օրվա կապակցությամբ դպրոց-հասարակություն կապի շրջանակում ԵԿՄ-ի հետ համագործակցության ընթացքում ցուցաբերած ակտիվ գործունեության, աշակերտներին ռազմահայրենասիրական ոգով դաստիարակելու գործում ունեցած նշանակալի ներդրման համար ՀՀ Էջմիածնի տարածքային բաժանմունքի պատվոգրով պարգևատրվեցին դպրոցի ուսուցիչներ Վարդիթեր Վարդերեսյանը և Ավետիք Հարությունյանը, իսկ շնորհակալագրերով՝ Արմենուհի Հայրումյանը և Քիշմիշ Սաղոյանը:
Գիտելիքի օրվան նվիրված հանդիսության ավարտից հետո տիկին Վարդերեսյանը հյուրերին ուղեկցեց Արա Հարությունյանին նվիրված թանգարան, որը բացվել է դպրոցի նախկին տնօրեն Էմիլ Եղիազարյանի և գործավար Զվարթ Ղուկասյանի ջանքերի շնորհիվ: Թանգարանում ցուցադրված էին դպրոցի շրջանավարտ Արա Հարությունյանի մանկության, պատանեկության ու հասունության շրջանի լուսանկարներն ու անձնական իրերը: Թանգարանում ներկայացված էր նաև Ակնալիճի 14 զոհված տղաների սխրանքը վկայող ցուցադրությունը, ովքեր փառքով պսակեցին անունները, ներկայացված էին նաև Էջմիածնի Երկրապահ և <Ակնալիճ> կամավորական ջոկատների անցած փառահեղ ուղին:
Այնուհետև տիկին Վարդերեսյանը հյուրերին հպարտությամբ ցույց տվեց իրագործած հսկայական ծրագրերը՝ Նախնական զինվորական պատրաստության /ՆԶՊ/ դասասենյակն ու <Արմաթ> ինժեներական լաբորատորիան, որոնք հագեցած էին անհրաժեշտ պաստառներով ու սարքավորումներով:
Արա Հարությունյանի անվան դպրոցը հիրավի մի շարք առանձնահատկություններով աչքի ընկնող դպրոց է, բարձր կարգապահությամբ ու մաքրասիրությամբ՝ արժանի իր հերոս սանի անվանը:
Հայրենասիրությունը սկսվում է ընտանիքից, զարգանում և թևավորվում է դպրոցում, ծավալվում՝ հայրենի հողում ու դառնում սրբազան մասունք հայրենի հողի մեջ:
Անուշ Ներսիսյան