Դիլիջան քաղաքը վաղուց ներառվել է զբոսաշրջիկների նախընտրած լավագույն հանգստավայրերի ցանկում: Տուրիստական հոսքն այստեղ էլ ավելի է աշխուժացել մասնավորապես հյուրատնային բիզնեսի շնորհիվ: Շքեղ ու թանկարժեք հյուրանոցներին ոչնչով չզիջող հյուրատներում ընտանեկան ջերմ միջավայրը գրավում է զբոսաշրջիկին ու նա անգամ ձմռանը այդ հյուրատան սպասվող հյուրն է:
Այդպիսի մի հյուրատուն երկու տարի առաջ Դիլիջանում բացված <Դոմ Ադոնիսն> է, որի ընդարձակ, գեղեցիկ ձևավորված ու հարմարավոտ պայմանները դարձել են զբոսաշրջիկների, անգամ ընտանիքների նախընտրելի հանգստավայրը:
Հյուրատան տիրուհու՝ Ռիմա Դավթյանի ջերմ ու հյուրընկալ վերաբերմունքն արդեն իսկ լիակատար հանգստի երաշխիք է: Ամուսնու և երեխաների հետ 30 տարուց ավելի ապրել և աշխատել է Ռուսաստանի Դաշնությունում, սակայն հայրենիքի, ծննդավայրի կարոտը 2018 թվականին նրանց վերադարձնում է հայրենի Դիլիջան:
Պատահաբար տեղեկանալով Միգրացիոն քաղաքականության մշակման միջազգային կենտրոնի (ՄՔՄՄԿ) ԵՄ-ն հանուն միգրանտների ներուժի օգտագործման՝ ի նպաստ Հայաստանի զարգացման. EU4IMPACT Armenia ծրագրի մասին, Ռիման ամուսնու հետ որոշում է պապական օջախը՝ իր հյուրընկալությամբ Դիլիջանում հայտնի Ադոնի տունը վերածել հյուրատան: Որպես ծրագրի շահառու կազմակերպության տրամադրած 3,5 մլն դրամով վերանորոգվում է տունը, սենյակները կահավորվում են անհրաժեշտ իրերով, իսկ անձնական ներդրած գումարով, որն, ի դեպ շարունակվում է ներդրվել առ այսօր, քանի որ անելիքները շատ են, հյուրատունը համալրվում է նորանոր գաղափարներով՝ ձևավորված ու գեղեցիկ բակով, բացօթյա սրճարանով ու հյուրերին գրավող հարմարավետության ստեղծմամբ:
— Հյուրատուն բացելու գաղափարը իմը և ամուսնունս էր։ Այն դարձրեցինք ընտանեկան բիզնես։ Սիրում եմ խոհանոց և շփում մարդկանց հետ։ Փոքր քայլերով առաջ գնալով՝ մենք ունեցանք այն, ինչ ունենք հիմա։ Մեր հյուրերն իրենց ապահով և հանգիստ են զգում մեր ջերմ ու հյուրընկալ տանիքի ներքո։ Զբոսաշրջիկը գալիս է Հայաստան, մեր ժպիտների, խոհանոցի, պատմամշակութային արժեքների և իհարկե հայի հյուրընկալությունը վայելելու համար,- պատմում է Ռիման ու հավելում,- Ինչպես սկսեցի ՞նք, ասեմ: Կազմակերպության տրամադրած գումարով նորոգեցինք ու կահավորեցինք հյուրատան առաջին հարկը, իսկ երկրոդ հարկն ամբողջովին կառուցվեց մեր ներդրած գումարներով ու դեռ շարունակում ենք ներդնել: Երկրորդ հարկում նույնպես սենյակներ կան, կառուցել ենք լողավազան, մանկական խաղավայր: Աշխատում ենք այնպես անել, որ հյուրերն իրենց զգան սեփական տանը: Ու երբ նրանք գոհ են հեռանում, ես մոռանում եմ բոլոր դժվարություններ, որոնք ունեցել ենք հյուրատան ստեղծման ընթացքում: Կարող ենք ընդունել 26 հոգու, առաջարկում ենք 8 սենյակ՝ կահավորված անհրաժեշտ բոլոր հարմարություններով, յուրաքանչյուրն առանձին սանհանգույցով:
<Դոմ Ադոնիս>-ի հյուրընկալ դռները բաց են ինչպես գիշերակացով, այնպես էլ առանց գիշերակացի այցելուների համար։ Գիշերակացի մեկ օրվա արժեքը 26.000 դրամից մինչև 35000 դրամ է:
Ռիման հաճույքով է հիշում իր առաջին հյուրերին, ում հետ ջերմ ու անկաշկանդ շփումը վերածվեց ավանդույթի: Այս հյուրատանն անգամ ընտանիքները, անծանոթ հյուրերը միմյանց հետ մտերմացել են, համատեղ իրենց ձեռքով պատրաստել ուտելիք, թեև հյուրատան արհեստավաժ խոհարարի մատուցած տոլման կամ հայկական ավանդական այլ ուտեստներն անպակաս են եղել նրանց սեղաններից: Իսկ լավ հյուրընկալության համբավը բանավոր գովազդով ավելի արագ է տարածվում <Դոմ Ադոնիս>-ին ապահովելով մշտական հյուրերով: Ի դեպ, այստեղ ամանորի համար սենյակներն արդեն նախապես ամրագրված են:
-Մեզ համար հաճելի է, որ մեր քաղաք շատերի համար հաճելի հանգստավայր է, , որ այն օրեցօր աճում ու բարգավաճում է: Չեմ զղջում, որ Ռուսաստանից վերադարձել ենք: Սա մեր տունն է, ինչու՞ զղջամ,- հրաժեշտից առաջ ասում է Ռիման:
Անուշ Ներսիսյան