Թուրքիայի արտաքին գործերի նախարար Մևլութ Չավուշօղլուն պատմել է ԱՄՆ պետքարտուղար Ռեքս Թիլերսոնի հետ սիրիական Աֆրինում թուրքական ԶՈւ-ի սկսած ռազմական գործողության շուրջ վարած քննարկումների մասին:
Ինչպես գրում է թուրքական «Հյուրրիյեթ» պարբերականը, Չավուշօղլուն պատմել է, որ Թիլերսոնը փորձել է պնդել, թե քրդական ուժերը Սիրիայի տարածքից չեն հրթիռակոծել թուրքական Հաթայ նահանգի դիրքերը, մինչդեռ Թուրքիայի ԱԳՆ ղեկավարը հակազդել է վերջինիս:
«Նա ասաց՝ «Մեր ընկերներն ասում են, որ Թուրքիայի ուղղությամբ հրթիռ չի արձակվել»: Ես էլ ասացի՝ «Մենք մեր ընկերների հայտնած տեղեկությունների վրա ենք հիմնվում», — պատմել է Չավուշօղլուն:
Թուրք նախարարի պնդմամբ՝ նա նաև խնդրել է ԱՄՆ պետքարտուղարին չխոչընդոտել Թուրքիայի գործողություններին Աֆրինում:
«Ես ասացի՝ «Եթե մեր կողմից չեք՝ մի էլ խանգարեք», — եզրափակել է Չավուշօղլուն:
Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որը ստացել է «Ձիթենու ճյուղ» անվանումը: Օդային առաջին հարձակումներից հետո, հունվարի 21-ին թուրքական ԶՈւ-ի զինվորականներն անցել են լայնամասշտաբ հարձակման նաև ցամաքում: Հայտնի է, որ թուրքական ԶՈւ-ին աջակցում է «Սիրիական ազատ բանակ» ընդդիմադիր խմբավորումը՝ ինչպես 2016թ.-ին ձեռնարկված «Եփրատի վահան» գործողության ժամանակ:
