Ռուսական զորքերը երեկ անօդաչու թռչող սարքերով հարվածներ են հասցրել Ուկրաինայի Կրիվոյ Ռոգ քաղաքի առևտրի կենտրոնին, զոհվել է առնվազն16 մարդ, 100-ից ավելի վիրավորներ կան, այդ թվում՝ երեխաներ, հաղորդում են տեղական իշխանությունները:
Կրիվոյ Ռոգը Ուկրաինայի նախագահի հայրենի քաղաքն է:
Վլադիմիր Զելենսկին հարձակումը որակել է «ցինիկ և նողկալի»: Նա հայտնել է, որ հարձակման երկու ալիք է եղել, երկրորդը թիրախավորել է տուժածներին շտապ օգնություն ցուցաբերողներին:
Ականատեսների վկայությամբ՝ հարվածի հետևանքով առաստաղը փլուզվել է ավտոկայանատեղի վրա, որտեղ օդային տագնապից հետո ապաստան էին փնտրում մարդիկ:
Նահանգապետ Օլեքսանդր Հանզան հայտնել է, որ խանութները առևտրի կենտրոնում հրդեհվել են: Նրա փոխանցմամբ՝ վիրավորների թիվը 130 է, այդ թվում՝ 23 երեխա:
«Նման հարձակումներն այլ բան չեն, քան ահաբեկչական ակտեր», — X-ում գրել է Ուկրաինայի նախագահը, — «Աշխարհը պետք է համարժեք արձագանքի՝ ագրեսորի նկատմամբ իրական ճնշմամբ»:
Եվրամիության արտաքին քաղաքականության և անվտանգության հարցերով բարձր ներկայացուցիչ Կայա Կալլասը նույն սոցցանցում գրել է, որ հարձակումը «ցույց է տալիս Մոսկվայի պատերազմի բացարձակ և ծայրաստիճան անբարոյականությունը»: «Սա միտումնավոր ահաբեկչություն է: Ռուսաստանը ցանկանում է ապրելու համար ոչ պիտանի դարձնել ուկրաինական քաղաքները», — պնդել է Կալլասը:
Հարձակումը հաջորդում է ուկրաինական քաղաքներին, այդ թվում՝ մայրաքաղաք Կիևին Ռուսաստանի հասցրած մի շարք այլ օդային հարվածներին:
Աղբյուր՝ Ազատություն